2. Plattdüütsch Karkendag een groote Erfolg
Grooten Toloop harrn de Plattdüütschen bi de 2. Plattdüütsch Karkendag in Lübeck
Öwer 400 Lüüd keemen to de 2. Plattdüütsch Karkendag in Lübeck un gungen op KulTour.
De tweete Plattdüütsch Karkendag weer een groote Erfolg. Öwer 400 Lüüd keemen un wulln de Reis „Plattdüütsch in de Kark op KulTour“ mitmaken. Dorto weern in de Karkhof vun de St. Petri-Kark in Lübeck Telte opbuut, in de du enkelte Deele vun plattdüütsch Kultur beleewen un mitmaken kunnst. To`n Anfang awer maakten de Posaunen vun de Klockenturm St. Petri de Minschen in Lübeck künni: Hier is wat los! Propst Meister begröötete de Besöökers, de ut Sleswig-Holsteen, ut Neddersassen, Hamborg un Meckelbörg anreist weern, op platt. Achteran gungen veele op KulTour un wannerten vun Telt to Telt, sungen mit Cord Denker, höörten to bi Volkert Ipsen, Dieter Andresen un Reinhard Reetz. In`t Kinnertelt mit Waldtraut Vogt worr Bingo speelt, de Lübecker Plattdüütsch Theoterspeelers vun de Volksgill informeerten öwer ehr Doon, in`t Telt vun de Plattdüütsch Zentrum un vun de Plattdüütsch Forum Herzogtum Lauenborg worr öwer Plattdüüsch Arbeid schnackt. Binn`n in de Kark weer de nahbuute Gutenberg-Druckerpress to sehn. In een Bökerschapp kunnst du di informeern öwer niee plattdüütsch Literatur.
Een groote Programmpunkt weern de Talkrunnen mit Tanja Tönnies vun de NDR. "Wie is dat denn nu mit Plattdüütsch Kark un Kultur?", weer ehr Ingangsfraag. Eenig weern sik all, dat Plattdüütsch in de Kark veel mit Kultur to Doon hett.
Jochen Wiegand, de bekannte Leedermaker un Leedersammler ut Hamborg, sung bekannte un weniger bekannte Leeder op platt un hett dorbi jümmer vun de Leeder ehr Geschicht vertellt.
De Goddesdeenst worr musikalisch utschmückt vun de Gospelensemble Wilster un de Bläsers ut de Karkenkreis Lübeck. As Paster Peter Schuchardt mit sien Predigt anfung, kreegten veele eerstmol een Schreck. He schimpte op dat Thema vun de Karkendag un meente, dat harr all doch nix mit Gott sien Woord to doon – un dat weer doch de Hauptsaak, worüm sik allens in de Kark dreihen schull. Man, as Pastorin Telse Möller-Göttsche em in`t Woord full un em sä, dat de Kark doch as Salt för de Eerd dor ween schall, wo de Minschen sünd, dor weer all Lüüd klaar: in düsse Dialogpredigt warrd noch eenmol dat Thema vun de Karkendag opnahmen. De verscheeden Argumente worrn uttuuscht un beide Positschionen keemen sik jümmer neeger, bit dat beide to`n Schluss instimmen kunn`n in dat Hoffen: Allens, wat dor leewt un weevt, warrd Gott löwen! De Kollekte vun meist 400€ geiht nu an een Inrichtung, de Gott sien Woord op lebennige Aart un Wies in de Welt künni maakt: De Ring evangelischer Gemeindepfadfinder. Een schööne, informative un fröhliche Dag gung mit de Dank an all de flietigen Hölpers un de Reisesegen vun Pastorin Möller-Göttsche toends.